ROTEIRO OTERIANO

O pasado xoves, 29 de outubro, fixemos o Roteiro Oteriano, aquí temos a mostra do traballo realizado: visita guiada ao mosteiro de Oseira, visita á casa museo de Otero Pedrayo, paseo pola cidade de Ourense atopando as referencias aos escritores ourensáns: Otero, Blanco Amor, Risco e finalmente baño nas Burgas… Un día moi completo de actividade cultural e nun ambiente relaxado de risas e diversión entre os alumnos de 4º ESO. Bo traballo rapaces!

GHALEGHO

Como ben sabes o "gh" utilízase para representar na escrita o noso rasgo dialectal da gheada, ese rasgo que nos fai rir cando o escoitamos na clase, porque é moi "ghañán", así falan os do monte… fóra prexuízos rapaces, fóra complexos,  síntete orgulloso de como falan teus pais e teus avós: non é castrapo é GHALEGHO.
Escoitade a estes rapaces que están arrasando na rede.

SAMAÍN

Xa estamos en outubro, chegou o outono e con el o Samaín. Un ano máis o Equipo de Dinamización da Lingua Galega do Instituto está a preparar unha sorpresa terrorífica para os alumnos de 1º e 2º de ESO.
O próximo mércores 29 de outubro os alumnos de 1º ESO subirán á biblioteca para asistir á celebración do Samaín, os alumnos de 2º de ESO asistirán o xoves 30.
Cal será o personaxe protagonista deste ano? O LOBISHOME non pode ser, porque xa nos acompañou hai dous anos; a SANTA COMPAÑA tampouco, porque veu o ano pasado; quen nos visitará esta vez?

Non esquezas traer cabazas, o medo xa cho poñemos nós!!!

Aquí temos o resultado desta actividade. Neste vídeo están os alumnos de 1º ESO, pero proximamente subiremos as fotos dos alumnos de 2º ou a estes levaríaos a Maruxaina co son das súas cornas?

GALEGO, O PASO ADIANTE

Xa podedes ver a montaxe audiovisual realizada por "GallaeciaFilmes" titulada "Galego, o paso adiante" e que participou no Correlingua 2014.

https://www.youtube.com/watch?feature=player_embedded&v=_VZgNYFLkqE

CORRELINGUA 2014

Aquí estades os alumnos e alumnas de 3º ESO, un ano máis participando no Correlingua, este ano ademais de asistir á carreira pola defensa da lingua galega, disfrutastes de ter gañado o premio do Manifesto.

                        NORABOA RAPACES!
                                                          BO TRABALLO!

    

ACTO AO QUE NON PODES FALTAR

O vindeiro venres día 30, no auditorio da casa da cultura Pintor Lloréns de Sada, ás 17:00 horas, presentación das últimas curtametraxes da produtora de audiovisuais do Equipo de Dinamización da Lingua Galega do IES Isaac Díaz Pardo.

FINALIZACIÓN DE RODAXE

O pasado luns, día 14 de abril, na casa da cultura de Sada, rematamos a gravación do proxecto audiovisual "Primeiros Versos", levado a cabo por un grupo de alumnos e de alumnas do IES Isaac Díaz Pardo. Son seis as producións realizadas a partir de poemas de seis autores galegos. As montaxes levan os títulos:

• "Ondas do mar", baseada nunha cantiga de Martín Códax.
• "Campos de soidade", baseada no poema "Pra a Habana!" de Rosalía de Castro.
• "Miña pomba dourada", baseada no poema "No niño novo do vento" de Álvaro Cunqueiro.
• "Galego, a chave do mundo", baseada no poema "A fala" de Manuel María.
• "Paixón e compromiso", Baseada no poema "A amizade ten flor que..." de Luísa Villalta.
• "Coas pálpebras baixas", baseada no poema homónimo de Montse Yoldi.

Axiña esperamos compartilas con todos vós. Estade atentos; merece a pena a letra, a música, as imaxes, a voz e a montaxe de cada unha das curtametraxes (tres minutos de duración cada unha delas). Con estas producións pretendemos tamén facer un primeiro achegamento á poesía galega. Este proxecto terá continuidade no vindeiro curso.

Con estas seis "curtas" participamos no concurso de vídeo poesía PALABRASINPAPEL.

Parabéns para a ducia de alumnos e alumnas do noso instituto que fixeron posible este proxecto. Terémosvos informados.

Na fotografía: Héctor, Antón e Carla, de 1ºB de bacharelato.